(14.02.2025) - Liebi Stammgäscht, langjährigi Wägbegleiter, Stammtischhöggler, Fründe, Kollege, Dorfverein, Mitbeschriter, Liferante, Ussedienschtler, Mitarbeiter und Alli die wo Spass am Zihlmaa hän:

Nach 24 Johr, fascht mim halbe Läbe also, han ich in dr`Wirtschaft Zihlmaa sehr viel Tolls dörfe erläbe und cha mit guetem Gwüsse eme guete Gfühl abträte und eme neue Wirt Platz mache.

Ich wird für euch am Muettertag, 11. Mai 2025 s`letschte Mol d`Zihlmaatüre ufmache und euch härzlich willkomme heisse.

Es isch ä schöni, churzwiligi, interessanti, lehrrichi, strängi, intensivi, luschtigi, mängmol au harti, aber vorallem tolli Zyt gsi mit euch.

Ich dangg euch Allne vo ganzem Härze für die grossi Unterstützig, die schöne Stunde, die interessante Gspräch am Stammtisch, die fründschaftliche Begegnige in dr`Beiz und eifach die tolli Zyt im Zihlmaa. Ohni euch wäri das Ganze nid so lang möglich gsi.

Ich wird sicherlich s`einte oder andere Tränli verdrugge, wenn ich dr`Schlüssel mim Nochfolger übergäh wird. Ich wird aber immer mit tolle Erinnerige und eme guete Gfühl an die langjährigi Zyt im Zihlmaa zrugg dängge.

Ich wünsch mir, dass es au witerhin ä Begegnigsort für tolli Gäscht blibt und mä die super Buurebeiz immer wider ufsuecht. Es isch ä Ort, wo mä schöni Stunde erläbe cha und in dr ruschtikale Umgäbig fröhlich si darf. So ä schöni urchigi Wirtschaft wie dr`Zihlmaa gits nümm oft. Gänd Sorg derzue.

Ich wünsch dr`zuekünftige Crew nur s`Allerbeschte fürd Zuekunft und hoff, dass „mini“ Beiz no lang so witerläbt und em neue Wirt so viel Glück bringt, wie Si mir brocht het.

Nomol viele Dangg an Alli. Mir wärde uns jo sicherlich am Chäsbängelstand uf em Barfi am Wiehnachtsmärt, an dr`Mäss uf em Petersplatz oder irgendwo Anderscht wider träffe.

Ich sag tschüss, wünsch euch Allne ä gueti und vorallem gsundi Zyt.

Alles Liebi

Eure Suti